Европада мавсум аллақачон старт олди, бироқ трансфер ойнаси якунига 8 кун қолган бир пайтда бир қатор таниқли футболчиларнинг тақдири сўроқ остида қолмоқда. Қуйида яқин кунларда жамоасини ўзгартирадиган юлдузлар ва уларнинг тахминий манзиллари ҳақида сўз юритамиз.

Айвен Тоуни — «Брентфорд»

«Арилар» ҳужумидаги асосий қурол Англия Премер-лигаси 1-тури доирасидаги «Кристал Пэлас»га (2:1) қарши баҳсда таркибдан четда қолдирилди. Англия миллий жамоаси билан Евро-2024 кумуш медалларига эга чиққан 28 ёшли ҳужумчига Саудия Арабистонининг «Ал Аҳли» клубидан қизиқиш бор. Бундан ташқари, 2022/2023 йилги сермаҳсул мавсумидан бери Айвенга «Челси» ва «Арсенал»дан қизиқиш билдириб келинади. Унинг келгуси кунлардаги қарори Англия футболидаги энг асосий трансфер интригаларидан бири бўлиб турибди.

Раҳим Стерлинг — «Челси»

Стерлингнинг трансфери ҳақидаги хабарлар инглиз матбуотида ўтган ҳафта якунида урчиб кетди. Лондонликларнинг «Манчестер Сити»га қарши дастлабки тур ўйинида Раҳим қайдномадан ўрин олмади. Энцо Мареска буни «техник қарор» деб изоҳлаган бўлса, футболчининг ўзи эълон қилган хабарда у «кўнгил айниши сабабли» учрашувни ўтказиб юборган. Аммо Педру Нету ва Жоау Феликс каби футболчиларнинг «аристократлар» сафига қўшилиши ортидан 29 ёшли вингернинг Лондон клубида қолиш эҳтимоли камайиб кетди. Айни пайтда унга «Ювентус»дан қизиқиш борлиги хабар қилинмоқда.

Виктор Осимҳен — «Наполи»

Нигериялик ҳужумчи кўплаб интервюларида Премер-лигада ўйнаш орзуси ҳақида айтиб ўтган. Дидие Дрогба ва унинг «Челси»сига болаликда мухлис бўлганини очиқ маълум қилган юлдузни тез орада «аристократлар» сафида кўрсак ажаб эмас. Боиси, клублар ўртасида аллақачон трансфер муносабати кетмоқда ва бу Ромелу Лукаку билан боғлиқ. «Sky Sports» ёзишича, белгиялик ҳужумчи Осимҳеннинг Лондонга трансферининг бир қисмига айланиши ва Неаполда бевосита унинг ўрнини эгаллаши мумкин.

25 ёшли ҳужумчининг трансфери масаласида «ПСЖ» ёз давомида фаол ишлади. Якунда эса «ебтўймас» «Челси» Викторни илиб кетиши мумкин.

Жейдон Санчо — «Манчестер Юнайтед»

Эрик тен Ҳагнинг сўзларига кўра, Жейдон Санчо «Фулҳэм»га қарши беллашувни «қулоқ инфекцияси сабабли» ўтказиб юборди. Нидерландиялик мураббий билан ярашиб олгандек кўринаётган бўлса-да, футболчининг ушбу мутахассис қўл остида ўйин амалиётига эга бўлиши барибир сўроқ остида.

Англиялик вингерга «ПСЖ»дан реал таклиф бор. «Боруссия Дортмунд» ва «Ювентус» ҳам футболчининг атрофидаги вазиятни диққат билан кузатаётганига қарамай, ушбу икки клубнинг «Манчестер Юнайтед» белгилаётган нархга келишиши амри маҳол.

Микел Мерино — «Реал Сосиедад»

Испания миллий жамоаси билан Европа чемпионатида зафар қучган Мерино Ла Лига очилиш ўйинида Иманол Алгуасил томонидан таркибдан четда қолдирилди ва жамоа кутилмаганда «Реале Арена»да «Райо Валекано»га ютказиб қўйди. Фабрицио Романо бир неча ҳафталардан бери Микелнинг «Арсенал» билан музокараларда эканини таъкидлаб келарди ва 22 август куни бўлажак трансферни тасдиқлади. «Вулверҳэмптон»га қарши беллашувда Деклан Райснинг жароҳат олиши жараённи янада тезлаштириб юборди.

Бен Чилуэлл — «Челси»

Англиялик ҳимоячи бош мураббий Энцо Маресканинг режаларига кирмаслигини мураббийнинг ўзи шахсан айтиб ўтди ва италиялик мутахассис футболчини позиция танлашни билмасликда айблади. Албатта, мураббийнинг қарорини клуб ҳурмат қилади ва 27 ёшли футболчи ўзига бошқа клуб қидиришга мажбур. Ҳозирча ҳеч бир манба Англия миллий жамоаси аъзосининг тахминий манзили борасида аниқ гап айтганича йўқ. Футболчининг ўзи ҳам сукут сақлашда давом этмоқда.

Марк Гэҳи — «Кристал Пэлас»

Кутилмаган тарзда Англия миллий жамоасининг Евро-2024даги асосий таркиб футболчисига айланган 24 ёшли ҳимоячи Гарет Саутгейт ишончини оқлашга эришди. Ва табиийки, унга харидорлар ҳам кўпайиб қолди. «Челси» академиясининг қадрланмаган иқтидорларидан бирига айниқ вақтда «Нюкасл» асосий даъвогар бўлиб турибди. Инглиз нашрларига кўра, лондонликлар Марк учун «зағизғонлар» томонидан берилган нақ 4 та таклифни рад этган ва қатъий равишда ҳимоячининг нархи 65 млн фунт эканлигини таъкидламоқда

Абдулбасит Валихонов тайёрлади