Ўзбекистон олимпия жамоаси 24 июл куни «ПСЖ» клуби уй аренаси саналмиш «Парк де Пренс» стадионида Испанияга қарши Олимпиададаги дебютини ўтказса, уч кун ўтиб мусобақага Африканинг 2-жамоаси сифатида келган Мисрга қарши саф тортади. «Ливерпул» Муҳаммад Салоҳнинг Париж-2024да ўйнашига рухсат бермаган бўлса-да, Эн-Нени сардорлигидаги мисрликлар гуруҳда Ўзбекистоннинг асосий рақобатчисига айланиши кутилмоқда.

Миср олимпия жамоаси – Африка вице-чемпиони

Ўзбекистон Париж-2024 1-турида Испанияга қарши ўйнаса, уч кун ўтиб Нант шаҳрида Миср билан рўбарў келади. Темур Кападзе мураббийлигидаги жамоа Олимпиадага Осиё вице-чемпиони сифатида етиб келган бўлса, Рожерио Микале мураббийлигидаги мисрликлар Африканинг 2-жамоаси саналади. Бразилиялик мутахассис қўл остидаги Миср олимпия жамоаси Африка миллатлар кубоги U23 турнири финалида Марокашга қўшимча бўлимларда мағлуб (1:2) бўлиб, Францияга Африка вице-чемпиони сифатида келган.

Миср сўнгги Токио-2020 Олимпиадасида ҳам иштирок этган ва чоракфиналгача етиб келишга эришганди.

Салоҳ йўқ, «Арсенал» собиқ ўйинчиси ва Зизо таркибда

Мисрнинг Париж-2024 турнирига борадиган 22 футболчидан иборат таркиби эълон қилинган. Рожерио Микале таркибга мамлакат футболи юлдузи Муҳаммад Салоҳни жалб этишга ҳар қанча уринмасин, футболчининг ўзи ҳам Париждаги турнирда иштирок этишга розилигини билдирган бўлса-да, «Ливерпул» ўз етакчисини қўйиб юбормади. Шу тариқа, 23 ёшдан катта 3 футболчи рўйхатига «Арсенал» собиқ яримҳимоячиси Муҳаммад Эн-Ненни, «Замалек» яримҳимоячиси Аҳмад Зизо чақирилди, 3-лимитдан эса фойдаланилмади. Сабаби бразилиялик мураббий истаган Маҳмуд Трезеге ва «Нант» вакили Мустафо Муҳаммаднинг ҳам клуби рухсат бермади.

Мисрнинг Олимпиада учун якуний таркиби:

Трансфер қиймати: Ўзбекистон Мисрдан қимматроқ

Миср олимпия жамоаси Париж-2024 Олимпиадасининг 16 жамоаси орасида таркибининг умумий трансфер баҳосига кўра, 13,7 миллион евро нарх билан 12-ўриндан жой олган. Ўзбекистон олимпия жамоаси таркиби эса Мисрдан икки баравар қиммат – 26,5 миллион еврога баҳолаган. Transfermarkt рейтингида Темур Кападзе шогирдлари бу борада Париж-2024да 9-ўринда бўлиб, Осиёнинг энг қиммат жамоаси саналади. Биздан кейинги ўринда эса Япония – 22,6 млн евро нарх билан 10-ўринда.

Ўзбекистоннинг энг қимматбаҳо ўйинчилари Аббосбек Файзуллаев (6 млн евро), Элдор Шомуродов (5 млн евро), Остон Ўрунов (2,5) ва Абдуқодир Ҳусанов (2,5 млн евро) саналаса, мисрликлардан Зизо ва Муҳаммад Эн-Нени энг қимматбаҳо ўйинчилар ҳисобланади. Эн-Нени ёзда «Арсенал» билан хайрлашган ва турнирга эркин агент сифатида келган.

 Мисрнинг энг қимматбаҳо 5 футболчиси:

1. Зизо – 4,5 млн евро

2. Муҳаммад Эн-Нени – 3,5 млн евро

3. Иброҳим Адел – 800 минг евро

4. Аҳмад Коука – 600 минг евро

5. Омар Файед – 600 минг евро.

Мисрнинг ўйинлари тақвими билан танишинг:

1-тур. 24 июл. Миср – Доминикан

2-тур. 27 июл. Миср – Ўзбекистон

3-тур. 30 июл. Миср – Испания.