Суперлига 7-тури доирасидаги «Олимпик» - «Пахтакор» (1:2) ўйинидан кейин дастлаб Максим Шацких матбуот анжуманида қатнашди.

«Ўйин анча қизиқарли ўтди, айниқса иккинчи бўлим. Фикримча, биз тўғри тактикани танлагандик. Энг асосийси – ғалабага эришилди. Иккинчи бўлимда яхшироқ кўриндик. Умуман олганда, майдонда тенгкураш кузатилган бўлса-да, биз рақибга нисбатан хавфлироқ кўриндик. Ғалаба учун йигитларга раҳмат.

- Дилшод Саитов бугун жароҳат олди, Ҳожиакбар Алижонов ҳам анчадан буён даволанмоқда, умуман жароҳатлар кўплиги нима билан боғлиқ?

- Келинг, аниқлаштирайлик Алижонов қаерда жароҳат олганди? Миллий жамоада! Биз уни Туркманистондаги ОЧЛ баҳсига туширмай, эҳтиёт қилдик. Миллий жамоада эса уни аямай, Туркманистонда майдонга туширишди, кейин эса жароҳат олди. Мана энди қанча вақт ўтдики, ҳар куни унинг қайтишини кутяпмиз. Душанба куни уни яна бир текширув кутмоқда. У индивидуал шуғулланмоқда. Ўйинга тайёр бўлса қайтади. Уни ҳар куни кутяпмиз. Ҳозиргача шифокорлар рухсат бермаётганди.

Саитовнинг жароҳати ҳам қай даражада экани эртага маълум бўлади. Кими Меркда ҳам кичик жароҳат бор. Черан эса энди тикланиб бормоқда. Жароҳатлар борасида омадимиз келмаяпти.

- Жамоадаги муҳит ҳақида? Клубдаги ички атмосфера жуда яхши. Майдондаги тортишувлар шунчаки ишда учрайдиган ҳолат. Бу борада гап бўлиши мумкин эмас. Муҳит яхши эмаслиги ҳақида кимдир гапирса ҳам ишонманг.

Йилни бошида ҳам айтгандим, яна қайтараман – бизга ўтган йилги «Пахтакор»дек қарамаслик керак. 90 фоиз таркиб алмашди, ахир. Қарашимизни ўзгартиришимиз лозим. Ёшлар бир деганда тайёр бўлиб қолмайди. Ўша таркибдан 3 футболчи қолган. 90 фоиз одам кетди. Йилни бошидаёқ айтганман – таркибни бунақа бирданига кескин алмаштириб бўлмайди. Эътибор беринг, таркибда ротация йўқ. U19 ва U21 бир чемпионатидан бирданига Суперлигага ўйинчи олиб бўлмайди, булар бошқа-бошқа сайёралар», - дея Максим Шацкихнинг сўзларини келтирган Tribuna.uz сайти мухбири.