«Манчестер Юнайтед»да жароҳатлар эпидемияси давом этмоқда.

«Ман Юнайтед» марказий ҳимоячиси Лисандро Мартинес узоқ муддатга сафдан чиқди. Клуб хабарига кўра, аргентиналик футболчи апрел ойида тўпиғидан олган жароҳатини янада жиддийлаштирган.

Лисандро 3 сентябр куни «Арсенал»га қарши баҳсда (1:3) жароҳат олганди. Аммо у «Брайтон» (1:3) ва «Бавария»га қарши ўйинларда (3:4) асосий таркибга киритилганди.

BBC хабарига кўра, футболчи камида 2-3 ой майдонга туша олмайди.

Бунгача, «МЮ» ҳимоячиларидан Люк Шоу ва Аарон Уан-Биссака қарийб қишгача сафдан чиққан бўлса, Тайрелл Маласия октябр ойига қадар, Серхио Регилон эса ФИФА кунлари якунига – 21 октябргача сафдан чиққани маълум қилинганди. Энди жамоада чап қанот ҳимоячиси қолмади.